تدوينة اليوم راح تكون خفيفة ولطيفة ونستعرض فيها وسيلة لاستعمال ولاعات Zippo مع السيجار بدون لا يتم طردك من مجتمعات السيجار في أنحاء العالم. :)
كعلامة تجارية، Zippo ظهرت للعالم في عام 1932في الولايات المتحدة، وكانت رد على نوع من الولاعات صادر من النمسا ويحمل تصميم مشابه. في عام 1936، حازوا على براءة اختراع لتصميمهم المقاوم للرياح، ولكن ما بدأوا يكتسبون شهرتهم اللي نعرفها اليوم الا بعد هذاك التاريخ بكم سنة.. تحديداً في الحرب العالمية الثانية، وهذا بسبب توظيف قدرتهم الصناعية في دعم الجيش الأمريكي من جهة، وابداعهم في تصنيع الولاعات رغم شح الموارد. يعني على سبيل المثال، قبل الحرب العالمية الثانية كانت ولاعات Zippo تصنع باستعمال سبيكة من الزنك والنحاس.. لكن مع قصور توفر المعادن هذي، بدأوا بتصميع العلبة الخارجية للولاعات من بقايا الفولاذ الموجود عندهم واللي كانوا يستعملونه في الصناعات الحربية. الموديلات الجديدة اكتسبت قاعدة جماهيرية كبيرة بسبب تصميمها واختلافها عن مثيلاتها في السوق.
طيب، إذا كانت ولاعات Zippo رائعة لهذي الدرجة، ايش اللي يمنع مدخني السيجار من استعمالها؟
الولاعة تستعمل نوع محدد من المنتجات النفطية في الاشتعال يسمى آيزوبارافينيك هايدروكاربون، أو "نفثا" كاسم مختصر.. الجدير بالذكر إن الـ "نفثا" هو أحد مكونات النابالم اللي كان يستعمل كسلاح عسكري في فيتنام. المنتج البترولي هذا له رائحة نفاثة وقوية جداً. اذا انك راح تستعمل الولاعة في Toasting (اللي هو تحميص الوجه الظاهر من الحشوة في أسفل السيجار)، ما راح يكون عندك مشكلة.. لكن اذا جيت تولعه بسحبات متواصلة، راح يدخل هذا المذاق للسيجار وراح يبقى معك إلى منتصف الثلث الأول في بعض الأحيان.
طيب والحل؟! .. حاولوا Zippo انهم ينزلون منتجات تمكنهم من اختراق جزء من السوق الخاص بمدخني السيجار. في 2007 نزلوا علامة تجارية اسمها Zippo BLU وهذي ولاعة تستعمل غاز البيوتين عديم الرائحة ونظام الاحتراق فيها Torch. حاولوا انهم يبقون على روح Zippo حية في التصميم، ولكن للأسف ما لاقت هذاك القبول، وانتهى المطاف في العلامة التجارية حقتهم بإنه يتم ايقافها في عام 2016 بشكل كلي.
لكن من رحم هذه التجربة الفاشلة، قرروا Zippo مجاراة السوق اللي بدأ يظهر فيه inserts تستعمل البيوتين ومن الممكن وضعها داخل الفريم لولاعات Zippo. نزلوا الـ inserts الخاصة بهم، وتجي نوعين.. نستعرضها تحت:
النوع الأول يجي بشعلة واحدة.. هذا مناسب لك إذا تحتاج ولاعة اقتصادية في استهلاك البيوتين، و الرينق قيج تبع السيجار اللي تدخنه يميل لإنه يكون ما بين الصغير والمتوسط (من روبوستو وتحت). الشي الثاني، الشعلة الواحدة مناسبة أكثر في تعديل مشاكل خطوط الاحتراق لأنها تمنحك دقة أعلى.
النوع الثاني يجي بشعلتين، وهذا مناسب اذا كان ما يهمك اقتصادية الولاعة، خاصة إذا كنت من النوع اللي يعبيها بشكل دوري وقبل لا تخلص (مع إنه ما ينصح بهذا الشي). أو إذا كنت تفضل الأحجام الكبيرة من السيجار. الشعلتين راح تختصر عليك وقت كبير في الاشعال.
من تجربتي مع النوعين.. لقيت إن الـ insert اللي فيه شعلة واحدة مماثل في الأداء لولاعة الـ S.T. Dupont MiniJet وعمرها أطول من ناحية الحاجة للتعبئة لأن الخزان اللي في ولاعة الـ Zippo أكبر حجماً. لكن للأسف ما عندي بيانات كافية للمقارنة بين الولاعة اللي فيها شعلة واحدة واللي فيها شعلتين. راح أحدث المراجعة هذي لما أحصل على بيانات أكثر.
كنت راح أكتب عن عدد السيجار اللي تقدر تولعه في كل تعبئة، لكن قررت لا. أحس الرقم هذا ممكن يكون مضلل خاصة وإننا نولع السيجار بطرق مختلفة عن بعضنا. فيه من يمضي وقت طويل جداً في تحميص الفوت، وهذا راح يستهلك بيوتين أكثر، وفيه مننا من يولعه بسرعة بدون تحميص. فيه مننا من يدخن لانسيرو أكثر من بقية أحجام السيجار، وفيه مننا من ما يدخن الا رنق قيج 60. استعمال السيجار كوحدة قياس راح تكون مشكلة، فاخترت اني ابعد عنها في المراجعة.
بشكل عام، تجربة استعمال الولاعة رائعة.. في النهاية كل الولاعات اللي تستعمل الـ Torch راح تكون متقاربة في الأداء من ناحية الاشتعال. نظرة الهلع في عيون أصحابك لما تطلع ولاعة Zippo حتى تولع فيها سيجار لا تقدر بثمن. الشي الثاني المهم بالنسبة لي، أحب إن اكسسوارات السيجار حقتي تكون كلها باللون الأزرق، ولهذا السبب أنا محدود في منتجات S.T. Dupont، لكن الحين فعلياً مكتبة Zippo من الهيكل الخارجي للولاعة معين لا ينضب. كل ما مليت من شكل، كل اللي عليك تسويه هو تغيير الهيكل الخارجي. والأهم من هذا كله، سعرها منطقي جداً، وأرخص من كل العلامات التجارية الثانية اللي تلقاها في السوق. يعني، اذا كان عندك ولاعة Zippo الحين، تقدر تاخذ لها insert بما لا يتجاوز الـ 16 الى 17 دولار من أمازون (بدون الشحن).
Comments