سيجار اليوم وصلني كهدية من الصديق العزيز وليد الخماش. وأوعدكم إن معزة وليد ما كان لها تأثير على مصداقية المراجعة (أوكي.. يمكن شوي بس) :)
اسم "مات بووث" من الأسماء المهمة في عالم البوتيك سيجار. ابتدأ حياته المهنية في مشاة البحرية الأمريكية (المارينز)، وبعد ما رجع لأمريكا أنشأ شركة حماية وسيكيورتي في لوس أنجلوس. منها صار يحتك بأنواع مختلفة من البشر، وأغلبهم تجار ورواد أعمال جايين لكاليفورنيا لتنمية ثرواتهم. من كثرة اطلاعه على نمط حياتهم صار ينتبه للأشياء اللي يحبونها ويبدأ مشاريع متخصصة فيها. ابتدأ بخط مجوهرات اسمه Room 101، واختياره للاسم كان ملفت للانتباه لأن له معاني متعددة:
في رواية جورج اوريل 1984، غرفة التعذيب اللي يستعملونها لتغيير أفكار الناس اللي عندهم أفكار ما هي مضبوطة اسمها Room 101. :)
101 هو الطريق السريع اللي يعبر هوليوود بالكامل. وهو قريب من المكان اللي نشأ فيه بووث في مراهقته.
101 هي التسمية اللي تطلق على مواد الجامعة اللي تعتبر مدخل لأي علم، وبووث كان يشوف ان منتجاته هي مدخل للتوسع في عالمها.
بعد المجوهرات، قرر بووث إنه يدخل عالم السيجار في عام 2009، وأنشأ بيت السيجار الخاص فيه اللي أطلق عليه نفس الاسم وبدأ بتعاون مع علامة السيجار الشهيرة Camacho. وبضربة حظ، ترافق مع التعاون هذا شراء دافيدوف لعلامة Camacho، وجاهم فوق البيعة الاتفاقية اللي مع بووث. ففجأة بووث لقى نفسه أحد العلامات التجارية اللي تسوقها دافيدوف وتهتم بها اهتمام خاص وتصنّعها في مصانعها في الهندوراس.
لكن دارت الأيام، وفي بداية 2017، أعلن مات بووث اعتزاله لعالم السيجار وتقاعده المبكر منها ورفض يجدد العقد حقه مع دافيدوف. وفي نهاية 2017، جحفلهم وقال انا كنسلت تقاعدي المبكر وأبي أرجع عالم السيجار وفتح علامته التجارية مجدداً لكن بدون لا يكون لدافيدوف أي دخل فيهم لا من بعيد أو من قريب. وقتها أعلن عن سيجاره الجديد: Room 101 Farce. "فارس" كلمة انجليزية تعني "كذبة" أو "مهزلة". بووث دايم يقول إن أسامي السيجار اللي يختارها فيها رسائل مبطنة. هذا وهي مبطنة، ما أدري لو بيصرح وش بيسوي. :)
الجدير بالذكر إن السيجار دخل قائمة أفضل 25 سيجار لعدد من مجلات ومواقع السيجار العالمية لعام 2019، أهمها سيجار أفيشيونادو.
التركيبة:
السيجار المفروض مسمينه رابطة العالم الإسلامي من كثر الدول اللي جايبين من محاصيلها.
خلونا نبدأ من الداخل ونشق طريقنا للخارج. الفيلر (الحشوة) جاية من محاصيل ثلاث دول. أولها، الدولة اللي لفّو فيها السيجار: الدومينيكان. وأضافوا عليه تبغ من نيكاراجوا، معناته لذعة البهارات والفلفل الأسود أكيد راح يكون لها حضور. وبعدين أضافوا تبغ من ولاية بنسيلفينيا في أمريكا. تبغ بنسيلفينيا مشهور بإن الليهيرو (ورق التبغ اللي ينمو في الثلث الأعلى من نبتة التبغ) يجي أقوى من الليهيرو العادي اللي يقطفونه من أي مكان ثاني بالعالم. أحد أشهر علامات السيجار اللي أبدعت في استغلال تبغ بنسيلفينيا هي روماكرافت، وفيه مراجعات لخطوط انتاجهم جاية بالطريق قريباً في المدونة.
الحين خلصنا من الحشوة، ننتقل للطبقة اللي بعدها، وهي البايندر (الغلاف الداخلي). هذا جابوه من إندونيسيا اللي تشتهر بنوعين من التبغ تستعمل بكثرة في البوتيك سيجار. النوعين هم سومطرة وجافا. النوع اللي اختاروه لـ Room 101 Farce هو سومطرة. ويعطي مذاق طيني عجيب للسيجار بس بشكل ما هو قوي.
أخيراً وليس آخراً، الرابر (الغلاف الخارجي) كان من محاصيل الاكوادور. اذا لاحظتوا، كثير من علامات السيجار الشهيرة يجيبون الرابر حقهم من الاكوادور، ولو سبق وتسائلتوا ليه، الإجابة بتكون سهلة. الاكوادور تعتبر من أفضل الأماكن بالعالم لزراعة الرابر لأنها تقع مباشرة على خط الاستواء، وتربتها غنية جداً، وفوق هذا جوها دائماً ملبّد بالغيوم. الأماكن الثانية بالعالم يدفعون فلوس حتى يقدرون يسوون غطاء لمحاصيل التبغ عن أشعة الشمس المباشرة والاكوادور الله وهبهم الغطاء بدون لا يسعوون له. الشي هذا يخلي أوراق التبغ تنمو بشكل قوي ورفيع جداً، مما يجعلها مناسبة بشكل مميز إنها تصير رابر.
التقديم:
أكثر شي يبدعون فيه Room 101 وحتى أخوياهم في Caldwell هو الباند اللي يحطونه على السيجار. دايم ما يكون ملفت بألوان جميلة وتصميم أنيق وجذاب. الخامة المطفية للورق اللي استعملوه لـ Room 101 Farce مع اللمعة الذهبية لتزيين وردة الساكورا اليابانية معطية طابع فخم. ولما تزيد عليها جمال شكل الرابر الاكوادوري من جهة وريحة السيجار الطينية من جهة ثانية، يطلع عندك خليط واعد يتجربة مميزة.
تجربة التدخين:
باختصار، Opus X.
هذا السيجار أقرب شي دخنته للـ Opus X. لو إننا مسوين جلسة تحضير أرواح وخلينا روح الـ Opus X تتلبس هذا السيجار ما طلع يشبهه كذا. من السحبة الأولى يغشك السيجار ويوهمك إنه معتق وهو ما هو معتق. بس أعتقد إن البايندر مع الرابر قاعدين يرقصون رقصة على حاسة تذوقك لدرجة توهمك بإنك تدخن تبغ معتق. النوتة الطينية من البايندر مع بهارات التبغ اللي من نيكاراجوا معطية خلطة تستحق التصفيق.
النصف الأول من السيجار كان رائع بمجمله، والنصف الثاني كان مثله مع اختلاف بسيط.. حرارة البهارات بدأت تتحول لحرارة القرفة أو الزنجبيل بس بدون طعمها. حرارة لذيذة، وتزيد أكثر مع الريتروهيل (خروج الدخان من الأنف).
السيجار حجمه لونزدايل (حجم أسمك شوي من اللانسيرو) ومن مزاياه إنك نادراً ما تواجه أي مشكلة في خط الاحتراق. بس تدخينه يكون سريع شوي. وقت التدخين الكامل كان ساعة وخمس دقايق. لكن الزين بالأحجام هذي هو ان النسبة والتناسب بين الرابر والبايندر من جهة، والحشوة من جهة ثانية يعتبر كبير نسبياً. هذا اللي يخلي مذاق الرابر والبايندر واضحين بشكل كبير، ويا زينه من وضوح.
بس نقطة تحتاج تنبيه، ونرجع بها للي ذكرناه عن محاصيل بينسيلفينيا. السيجار يعطي جرعة نيكوتين قوية، وممكن تسبب غثيان للمدخن المبتدئ. أنصح بمشروبات ومأكولات سكرّية معه للحد من تأثير النيكوتين.
الحكم النهائي (89/100):
تجربة تدخين الـ Room 101 Farce تجربة جميلة جداً من بدايتها لنهايتها. وأعتبره بديل مناسب جداً للي يبي يدخن الـ Opus X بس ما هو قادر يلقاه بسبب ندرته بالسوق. أكرر شكري لوليد على الهدية اللي خلتني أحرص على وجود كمية من هذا السيجار الرائع في الهيوميدور.
بالمناسبة، من أكثر الأسئلة اللي تجيني في الفترة الأخيرة هي عن آلية التقييم. تدوينة يوم الجمعة راح تشرح طريقة التقييم، وبيكون فيها ملف Excel تقدرون تحملونه وتقييمون السيجار اللي تدخنونه معي بنفس الآلية.
Σχόλια