سيجار اليوم من براند عريق: Ramon Allones، ولكن بروح جديدة. في تعاون مع أهم اسم في عالم السيجار AJ Fernandez، يجينا هذا السيجار اللي من النظرة الأولى يخليك تعرف إنك على وشك تخوض تجربة استثنائية.. والدليل تقييماته اللي تتراوح بين 92 و93، ودخوله في قائمة أفضل 25 سيجار لعام 2018.
السيجار حجمه روبوستو (550) ومهما حاول الباند الأول والباند الثاني وغلاف السيدار انهم يخبون جمال الرابر ما يقدرون. الرابر عبارة عن هابانو اوسكيورو من الاكوادور يخليك تحلف إنه هو والاسبريسو أشقاء من كثر ما يتشابهون باللون.
من التوليعة الأولى يفاجئك السيجار بنكهته العميقة. الحشوة اللي جمعها AJ من أربعة أماكن مختلفة بنيكاراجوا (كونديقا، هالابا، ايستيللي، وبوابلو نويفو) تعطيك كل النوتات الغامقة اللي تتوقعها وتمني نفسك فيها.
النوتات في النصف الأول تتراوح ما بين قهوة.. بودرة تشوكليت.. نوتة خشبية من السيدار.. ونوتة مثيرة للاهتمام احتاج أوصفها بشكل منفصل. فيه نكهة تشبه الخبز المحروق.. أقرب شي لها هي أطراف البيتزا نيويورك-ستايل اللي تكون مخبوزة بأفران الحطب وتجي بعض أطرافها متفحمة. لذيذة جداً جداً.
خلونا نتكلم عن الدخان اللي يطلع من السيجار شوي.. ما مر علي سيجار دخانه يشبه الحرير بكثافته ونعومته وتماسكه مثل هذا السيجار. وبعد ما تنفخه يترك طبقة زيتية خفيفة على اللسان وداخل الفم تخلي أي شي تشربه يصير 10 مرات أفضل. والرماد! ما يحتاج اتكلم، أخلي الفيديو يشرح.
وصلنا النص الثاني، وطار الباند الثاني، وبعده طار الباند الرئيسي، والسيجار لا زال يبهرني بأداءه. فيه شعور أحس به لما تبدأ جرعة النيكوتين تقوى، يشبه الغصة اللي تخليني ادور على اشياء ارتشفها بشكل مستمر. بعد ما شلت الباند الرئيسي بديت أحس بها. النيكوتين في المرحلة هذي جداً قوي.
ومثل كل الأوقات الجميلة، لا بد ما يجي وقت وتنتهي. المذهل هنا إنه على الرغم من صغر حجمه النسبي (550) الا ان وقت التدخين كان طويل جداً. ساعة و50 دقيقة تقريباً.. السيجار رائع جداً وأحطه بنفس مستوى الأشياء اللي جربتها من Padron. ياخذ +A، ولو أقدر أملأ منه خيشة كان مليتها!
Comments