Quai d’Orsay Senadores Edición Limitada 2019

سبق وان أخذنا نظرة على أحد اصدارات كيه دورسيه في المدونة، واللي كان وقتها أول سيجار كوبي تتم مراجعته هنا. راح أقتبس لكم النذة التعريفية عن العلامة التجارية أدناه:

كيه دورسيه تعتبر من العلامات التجارية الصغيرة بالعمر في كوبا، مقارنة بعمالقة كانوا يصنعون السيجار من حوالي 200 سنة. تم انشاء هذي العلامة التجارية عام 1973 بتوجيه من "فاليري جيسكار ديستان" اللي كان بفترة من الفترات وزير المالية والاقتصاد الفرنسي، وبعدين صار رئيس لفرنسا. كانت احدى طلباته هي وجود سيجار خفيف النكهة لدرجة انه ما يقدر يطغى على طعم الشمبانيا لما يشربها معه. أحد شركات التبغ الفرنسية تعاونت مع شركة كوبا توباكو (اللي كانت ماسكة تصدير السيجار الكوبي قبل لا ينشؤون هابانوس S.A) وبدأوا بإنتاج السيجار من هذي العلامة اللي اختاروا لها اسم كيه دورسيه... لكن ليه اختاروا هالإسم تحديداً؟

كيه دورسيه هي منطقة (شارع؟ جزء من شارع؟) تقع على نهر السين في باريس. كلمة "كيه" تطلق على جزء من الضفة اللي على نهر السين يسمونها بالعربية "رصيف". أحد أهم الأرصفة هذي اسمه دورسيه، وتكمن أهمية هذا الرصيف بتواجد سفارات الدول ووزارة الخارجية الفرنسية فيه، لدرجة إنه صار يطلق إسم "كيه دورسيه" على وزارة الخارجية الفرنسية، مثل ما يطلق على وزارة الدفاع الأمريكية اسم "بنتاغون".

يعني لو كان هذا السيجار بإيعاز سعودي، كان صار اسمه حي السفارات نمبر 50. :)

المشكلة اللي واجهتها هذي الشركة انها صارت niche (محصورة على عدد قليل جداً جداً من الزباين). يعني كانت متداولة بين عدد قليل من مدخني السيجار الفرنسيين والدبلوماسيين ورجال الأعمال اللي يزورونهم. في السنوات الأخيرة قرروا انهم يغيرون من استراتيجتهم ويفتحون حرية الوصول لمنتجاتهم لأكبر عدد ممكن من مدخني السيجار حول العالم. تبلورت هذي الخطة في بداية 2018، لما أطلقوا الكيه دورسيه نمبر 50 ونمبر 54. تزامن هذا الاطلاق مع تغيير في شكل العلامة التجارية بعد ما كان الباند حقها بيج وباهت وممل (مثل ما في الصورة اللي على اليسار)، صار ذهبي ولامع وبراق.

لكن قبل لا ننظر لسيجار اليوم، نحتاج نعرف معنى "اديسيون ليميتادا / ليميتيد ايديشون / اصدار محدود" اللي تكون موجودة على بعض اصدارات هابانوس مقرونة بسنة معينة.

في عام 2000، قرروا هابانوس إنهم يصدرون اصدارات محدودة من علاماتهم التجارية تكون مصنّعة بأحجام مختلفة عن الأحجام اللي موجودة في الانتاجات العادية وبعدد محدود جداً. ومن عام 2005، بدأوا في حصر أنواع الاصدارات المحدودة لكل سنة بثلاثة اصدارات. يعني كل سنة، يختارون ثلاث علامات تجارية، وكل علامة ينزل منها اصدار بحجم جديد مخصص فقط للانتاج هذا. أيضاً من المتعارف عليه إن الاصدارات هذي يكون التبغ اللي فيها معتق على الأقل سنتين قبل البدء في لفّه.

في 2019، اعلنوا في حفل تدشين الاصدارات المحدودة، اللي عقدوه في باريس على متن يخت في نهر السين، عن ثلاث اصدارات:

1. رامون أيونيس نمبر 2 ايديسيون ليميتادا 2019

2. مونتيكريستو سوبريموس ايديسيون ليميتادا 2019

3. كيه دورسيه سينادوريس ايديسيون ليميتادا 2019 (سيجار اليوم)

اصدار الكيه دورسيه المحدود في 2019 جاء كاحتفال بمرور 45 عام على اطلاق أول سيجار من هذي العلامة التجارية، واختاروا له اسم "سينادوريس" وتعني سيناتور بالأسباني، واللي أظن إنها جت من ارتباط كيه دورسيه الوثيق بالدبلوماسيين والسفراء والممثلين الحكوميين.

• التقديم:

خلونا نتفق على شي في البداية.. سيجار الكيه دورسيه سنادوريس سيجار شكله الخارجي رائع ويخطف الأنفاس. حتى حجم السيجار مميز جداً (648) بالنسبة للاصدارات الكوبية، وهذا يجعله مقارب لحجم الفيفا كورونا من الاصدارات الغير كوبية، وإن كان أطول منه بكسور بسيطة فوق الـ 6 انش.. الجدير بالذكر إن أول استعمال لهذا الحجم كان في RyJ الليميتيد ايديشن لعام 2004.

الرابر (الغلاف الخارجي) أغمق بكثير من بقية اصدارات كيه دورسيه بشكل خاص، والسواد الأعظم من الانتاج الكوبي بشكل عام. لونه اكتسب بريق اضافي لما تتم مقارنته مع تدرجات الذهبي والأصفر في الباند الرئيسي والباند الثانوي. ملمس الرابر ناعم، لكن تعرجات البايندر (الغلاف الداخلي) تحته واضحة جداً للعيان مثل ما هو مبين في الصور، وواضحة باللمس. السيجار ليّن بشكل سلس أثناء الضغط الا في منطقة واحدة فوق الباند الرئيسي. هذي نقطة مهمة راح نرجع لها أثناء تجربة التدخين.

رائحة السيجار باهتة نسبياً لكن جميلة بشكل عام. نوتة القرفة واضحة جداً هنا لدرجة اني تحمست أذوقها بعد ما أولعه.

• تجربة التدخين:

قصيت السيجار باستعمال كتر الكوليبري، وهي ستريت كت. حاولت إني ما آخذ كثير من تحت الكاب، وجربت السحبة بعدها. كانت للأسف شبه مسدودة بالكامل. قصيت جزء اضافي لأني إلى هذي اللحظة أبي أحط اللوم على نفسي وما هو على السيجار. قصيت زيادة.. لا زالت السحبة شبه مسدودة، لكن أرحم من قبل بشوي.

ولعت السيجار وحاولت أدخنه بحيث تكون سحبتي متوسطة القوة وطويلة جداً. كمية الدخان كانت شحيحة، على الرغم من ان الفوت (مكان ما ولعت السيجار) يطلع منه الدخان بكمية أكبر من اللي انا أسحبه. لكن، والحق يقال على الرغم من شح الدخان، إلا ان طعم الدخان كان لذيذ جداً. نوتة القرفة حضورها قوي ما هو فقط كنكهة، بل كحرارة ولذعة. يصاحب القرفة نوتة السكر المحروق بشكل يزيدها جمال. والمذاق العالق في الفم بعدها فيه نوتة ذكرتني بالرامون أيونيس اللي سواه AJ Fernandez من ناحية العجين المحروق (مثل أطراف البيتزا).

في هالمرحلة السيجار يقهر. فيه نوتات لذيذة جداً وودي لو إني أقدر أجرب أكثر منها، لكن شح الدخان بسبب الانسداد كان حايل بيني وبينها. تمنيت ان السيجار لما يبدأ يحتمي يفك شوي، لكن للأسف ما فاد. رجعت اتفحص السيجار. المنطقة العسيرة على الضغط فوق الباند كانت مزعجتني، وبديت اقتنع ان مكان الانسداد هنا. المشكلة إن البيرفيكدرو ما هي معي حتى أعالج هذا الانسداد. لكن هذا ما منعني من إني أحاول بحلول ثانية.. أول شي جربته هو اني اضغط على السيجار بالسبابة والابهام على منطقة الباند، وألف السيجار يمين ويسار. للأسف الطريقة هذي ما جابت نتيجة، حتى لما أكون أضغط أثناء السحبة.

انتقلت للحل الثاني، وهو إني أجرب أعض على السيجار بأسناني وقت السحبة حتى أفتح قناة تسمح للدخان إنه يمر. يمكن تحسنت السحبة بمقدار 25% بالطريقة هذي.. قررت اكمل التدخين ونشوف وش يصير.

لما وصلت للثلث الثاني بدأ االتغير في النوتات يتضح، وكمية الدخان تزيد بشكل ملحوظ. لا زالت السحبة ثقيلة، لكن التجربة كمذاق فقط كانت من أجمل ما مر علي في السيجار الكوبي على الاطلاق. طعم التبغ عميق جداً ويبقى في الفم لفترات طويلة. القرفة لا زالت موجودة لكن تراجعت للخلف وجائ مكانها نوتة طينية قوية الشي الوحيد اللي اقدر أشبهه فيها هو لما تكون جالس جنب أحد قاعد ينظف الكمأ (بلهجتنا المحلية: الفقع)... نفس الانبعاث للأتربة اللي تستشعره في الهواء بالضبط. هنا كنت مستمتع جداً على الرغم من انسداد السيجار.. ولما مكونات السيجار تخليك تستمتع بالطريقة هذي رغم الانسداد فهذي شهادة للمكونات بالجودة.

لكن، الجودة هذي مثل كل الأحلام الجميلة وكان لازم انها تنتهي.. بعد ما طاح الرماد في حضني، وشلت الباند الثانوي، بدأ طعم السيجار يتغير. وما اقصد هنا إنه بدأ يتغير بظهور نوتة مشوقة، أو تغير في القوام.. لا.. بدأ طعم السيجار يصير مزعج جداً. فكّر بأشد مذاق حمضي ممكن تستطعمه في سيجار.. لقيته؟ الحين أضربه في 1000. هذا اللي كنت اذوقه. كان طعم سيء ومزعج. حاولت اني أكمل أدخن راجياً من المولى عز وجل إن هذا المذاق يختفي لكن للأسف لا.. كان باقي وكل ما له بازدياد.

شلت الباند الرئيسي، ورجعت اتفحص السيجار.. هالمرة من عند المكان اللي قصيته من عنده. بديت أمرر اصبعي على مكان القص. حسيت بنتوء واضح. جربت مرة ثانية بأظفري. النتوء هذا قدرت اني احركه. بعدين بأظفرين حاولت اني اسحب الجزء البارز هذا. بعد جهد جهيد، سحبته وطلع معي غصن أحد أوراق التبغ أسمك من عود الأسنان يمتد بطول الجزء المتبقي من السيجار وصولاً للجمرة (طرفه الثاني كان أسود من الاحتراق). جربت أسحب من السيجار.. تحسنت السحبة بشكل واضح، لكن اياً كان المذاق اللي طلع لي لا زال متعلق بالبقية الباقية من السيجار. رميت الباقي وقررت أوقف هنا.

• التقييم النهائي (67/100):

يمكن تكون هذي اول مرة أعطي رقم في التقييم وأكون ماني راضي عنه تمام الرضى، لكن توزيع النقاط على على فئات متعددة يجبرني أعطيه تقييم اعلى من ما يستحق. الكواليتي كونترول هذا ما يرتقي لا لإنه يكون ليميتيد ايديشون، ولا اصدار عادي.. يمكن حتى ما يرتقي لإنه يكون سيجار تقليد.

اذا كان هذا السيجار عينة مرضية لهابانوس إنها تكون ممثلة لإنتاجهم، فهذا سيجار سيء، ولا يمكن اني انصح به مطلقاً. حتى الثلث الثاني ما يشفع له.