پلاسينسيا من أعرق شركات السيجار العائلية، وكان بداية انطلاقها عام ١٨٦٥م. حتى عام ٢٠١٧، كانوا مكتفين بزراعة التبغ وتعتيقه وتوريده لكبار المصنعين. أكثر من ٣٠ اسم من أسماء مهمة بعالم السيجار مثل بدرون وروكي پاتيل وروميو اند جولييت يستعملون تبغ پلاسينسيا. بس في ٢٠١٧ تغيرت اللعبة.
وهنا تبدأ أول تجربة لي، واللي اخترتها تكون مع ألمع نجم من تشكيلتهم: پلاسينسيا ألما فويرتي (الروح القوية) وكان فعلاً اسم على مسمى. الألما فويرتي فاز بالمركز التاسع لأفضل ٢٥ سيجار من سيجار أفيشيونادو. الحجم اللي فاز هو السالمون ٧٥٨ اللي يجي مخروطي الشكل. اللي جربته كان تورو ٦٥٤.
أول شي يعصف بك لما تولع هو ريحة العشب المقصوص. أحس إن عملية التعتيق للتبغ اللي استمرت ١٠ سنوات سوت شي بالكلوروفيل اللي بورقة التبغ أعجز عن شرحه. بعدين بدأ إجرام الفلفل الأسود. قوي جداً. لسعة الفلفل والبهارات خصوصاً لما تطلع الدخان من الخشم مؤلمة بشكل لذيذ ولذيذة بشكل مؤلم.
بعدها تبدأ تنتبه للحموضة الحاضرة بالنكهة. أول شي كتبته بالنوتة هو "Acidity". فكر معي بحموضة القهوة المقطرة اللي تبقى عالقة بفمك بين الرشفات. السيجار هذا يعطيك مثلها ومطعمة بقشر برتقال. أول شي سويته هو إني جبت تشوكليت بنكهة البرتقال وحطيته بجنبي. وتركت النكهات تتعرف على بعضها.
الألما فويرتي من أفضل الأشياء اللي دخنتها على الإطلاق. سيجار واضح إن نيستور پلاسينسيا الأب ونيستور الإبن حطوا فيه كل الحب والمعرفة والخبرة اللي كونوها على مر السنين. حتى علبة السيجار توحي لك بمقدار اهتمامهم بحيث إن الغطاء لما تقلبه يصير عبارة عن طفاية تقدر تستعملها وتحتفظ بها.
عموماً، إذا كان الأوليڤا سيري ڤي ميلانيو يأخذ -A، الألما فويرتي يأخذ +A ما تنقص شعرة.
תגובות