PerfecDraw

مراجعة سيجار اليوم ابتدت كمراجعة لواحد من أجمل لاينات Ashton المملوكة لـ روبرت ليڤين، اللي بنى شركته بالاعتماد على علاقته بعائلة فوينتي.

اللاين هو VSG او Virgin Sun Grown بحجم ايكليبس (٦٥٠). لكن واجهت مشكلة أثناء تدخينه احتاجت تدخل عاجل لواحدة من أهم اكسسوارات السيجار.

لما ولعت السيجار كان واضح إن السحبة جداً ثقيلة، بس كنت متمني إن السيجار لما يحتمي يبدأ يفك لحاله. أي أحد جرب يشرب عصير المانجو اللي يكون فيه قطع، مرّ بتجربة إن واحدة من القطع تنشب بالمزاز، وتصير السحبة ثقيلة ومزعجة واحياناً شبه مستحيلة. السيجار صار له نفس الشي.

الأسباب اللي تؤدي للانسداد هذا كثيرة، وراح نتكلم عن بعضها اليوم، لكن علاجها واحد: PerfecDraw.

البيرفيكدراو هي عبارة عن أداة بحجم القلم بداخلها شي يشبه الرمح في نهايته أشواك بحيث تسهل عملية الدخول، بس مع خروجها تسحب أي عوالق تكون صادفتها بطريقها.

كنت أشك إنه فيه غصن من ورق التبغ مسبب انسداد بمجرى الهواء. ابتديت بإدخال البيرفيكدراو في المنتصف وبشكل عامودي حتى ما تلمس الغلاف الداخلي او الخارجي من داخل وتعدم السيجار.

بمجرد ما وصلت للعمق اللي في الصورة حسيت بمقاومة. لفيت الأداة بمكانها أكثر من لفة، وبديت أسحب.

هذي كمية التبغ اللي طلعت بعد ما سحبت البيرفيكدراو، وما كان فيها أي أثر لغصن.

بعد العملية الجراحية صارت السحبة من أروع ما يكون والبيرفيكدراو أنقذت سيجار من آشتون من إنه ينرمى في الزبالة وانتم بكرامة. من الدخان اللي كان يطلع من الفوت (الطرف المشتعل من السيجار) كان واضح انه فيه خيرات محروم منها. الأداة قيمتها ٣٠ دولار ولو تنقذ فيها سيجار واحد جابت قيمتها.

واصلت تدخين السيجار حتى نهايته وكان خرافي، بس تقييمه بيكون في ثريد ثاني لما تكون التجربة ما يشوبها أي شائبة. البيرفيكدراو أنصح بها وبشدة لكل مدخن للسيجار. ما بين حجمها النحيف، وسعرها المناسب، وتصميم الاسنان اللي على طرفها المدبب، كلها أشياء تمنعك من إنك تندم على قرار اقتناءها.