أحد أهم أهداف إنشاء هذي المدونة هو وضع مكتبة للمهتم بتدخين السيجار حتى تساعده يقرر ايش يدخن، ووين يدخنه. لما أجي أبي أكتب عن "وين" معناته لازم أجرب ضيافة كل لاونجات السيجار في المملكة، وبإذن الله في الخليج بمجرد ما يفتح باب السفر. لكن لما تعقد العزم على إنك تجرب كل مقدمين خدمةٍ ما، راح يصادف طريقك مستويات عالية، ومستويات متدنية. هذي طبيعة الحياة. spoiler alert... مراجعة اليوم واحدة من أدنى المستويات الممكنة فيما يخص اللاونجات في السعودية.
مدينة الملك عبدالله الإقتصادية كانت واحدة من أكثر المشاريع الواعدة لما تم الإعلان عنها في 2005 تحقيقاً لرؤية الملك عبدالله بن عبدالعزيز رحمه الله رحمة واسعة.. اكتملت المرحلة الأولى منها في 2010، وهي إجمالاً تنقسم إلى عدة أقسام.. فيها ميناء من المعتزم جعله من أكبر المواني في المنطقة بطاقة استيعابية مهولة لسفن الشحن من جهة، واستقبال الحجاج بحراً من جهة ثانية. فيها منطقة صناعية راح تكون مخصصة لمصانع الأغذية والأدوية. لكن كل ما اقتربت من منتصف المدينة، تبدأ تتغير نوعية الأقسام هذي.. مثلاً، فيه منطقة مخصصة للأحياء السكنية مقسمة لخمس أحياء. فيها كورنيش وقناة مائية تخترق وسط المدينة يضم نادي لليخوت. القسم التعليمي راح يضم جامعات ومدارس ومعاهد أبحاث.. أما "الجزيرة المالية" راح تكون مخصصة للمؤسسات المالية الدولية وجهات التمويل.
كل الأقسام المذكورة تعطيك تصور مسبق عن نمط الحياة المستهدف للمدينة، واللي ذكرتني كثير لما زرتها لأول مرة بطفولتي في الهيئة الملكية في الجبيل في فترة ما قبل حرب الخليج الثانية. نمط الحياة اللي تصورناه يقتضي وجود خدمات تلائم كل الشرائح المجتمعية واهتماماتهم وهواياتهم، وأحد هذي الشرائح هم مدخني السيجار واللي تم انشاء لاونج سيجار لهم في فندق البيلسان والذي تم افتتاحه عام 2013.
سمعت كثير عن لاونج كروهو في فندق البيلسان ووفي إحدى زياراتي للمنطقة الغربية، قررت إني أشد الرحال لمدينة الملك عبدالله الإقتصادية بس حتى أزور اللاونج.. أدخن فيه.. وبعدين أطلع من هناك للرياض.
وصلت لمواقف الفندق العصر وكانت المنطقة المحيطة في الفندق مزدحمة بالناس اللي جايين يغيرون جو في KAEC كأحد وجهات السياحة الداخلية.. دخلت للوبي وتوجهت مباشرة للاونج.
الجلسات:
من توصل لمدخل اللاونج راح تحس إنك مقبل على مكان متعوب على انشاؤه، و كيف أخذوا وقت طويل بالإهتمام بتفاصيله.. أولها الاسم المرتبط بعالم السيجار (الكوروهو هو اسم أحد أنواع الرابر أو الغلاف الخارجي للسيجار والمنسوب لأحد المزارع الكوبية اللي قدمت هذي النبتة للعالم لأول مرة). ثانيها الديكور الداخلي.. كل شي ملبس بخشب الماهوقني الغامق .. الكراسي خشبية.. الجدران خشبية.. واللي ما هو خشبي، يكون إما زجاج أو جلد أسود متناغم مع الدرجة الغامقة من الخشب.
وفوق هذا أجهزة الشفط المركزي والتبريد تعمل بشكل سلس جداً، وإن كان خربها مسألة إن الباب المطل على الجلسات الخارجية دائماً ما يتركونه مفتوح لدرجة إنه أحتاج أقوم أسكره بنفسي.
بالحديث عن الباب المؤدي للخارج فيه جلسات خارجية جميلة لكن ما هو مسموح بتدخين السيجار فيها. راح نتطرق لها لما نجي نتكلم عن الاختصاص. جلساتهم الداخلية وديكورها رائعة جداً وتستاهل العلامة الكاملة 20/20.
الخدمة:
بالعادة في المراجعات هذي اتكلم عن القهوة والحلى أول قبل الدخول لموضوع الخدمة.. لكن هنا ضروري أتكلم عن الخدمة أول.
الخدمة في كرورهو لاونج أسوأ خدمة لاونج مرت علي داخل المملكة وخارجها. راح أذكر أحد الأسباب هنا، وبعضها في الأقسام اللاحقة.
أولاً، دخلت اللاونج ورحب فيني الموظف اللي على الكاونتر الساعة 4:40 عصراً، ووقتها ما فيه إلا أنا في اللاونج. أعطاني الـ QR كود للمنيو وقال إنه راح يرجع ياخذ الطلب مني. بعد مرور 30 دقيقة وأنا أنتظر إنه يجي حتى أطلب، قمت حتى أشوف وين راح لا يكون صار له شي. كان جالس برى يسولف مع واحد من العاملين الآخرين وهم ينزلون طلب للجالسين في الخارج. قال لي دقايق وراح يكون عندي.. وما جاء أخذ الطلب الا الساعة 5:20 تقريباً. الطلب أخذ 15 دقيقة حتى جهز وجابوه لي. يعني من دخلت إلى أن نزل طلبي مرت 55 دقيقة انتظار.
اللي زاد الطين بلة، صار فيه اشكالية في اللاتيه واشكالية ثانية في الحلى.. راح اتطرق لها تحت..
الخدمة 0/20.
القهوة:
سألتهم لما جيت أطلب عن مكينة القهوة اللي يستعملونها.. قال لي انها شبيهة بالنيسبريسو. على طول في ذهني بدأت تتناقص علامات التقييم. طلبت منهم لاتيه لكن لأني أعرف النيسبريسو قلت لهم يضيفون لي شوت اسبريسو عليه. قال لي أوكي.
جاني الطلب بعد التأخير المذكور فوق بدون شوت الاسبريسو اللي طلبته ومضاف عليّ في قيمة الفاتورة (يعني ما هو تكرماً منهم). ناديت الموظف الفلبيني اللي جاب الطلب وكان متجاوب معي أكثر من الموظف اللي من جنسية عربية أتحفظ عن ذكرها. قلت له أنا طلبت اللاتيه مع شوت زيادة.. لو سمحت رجعها وسووا واحدة ثانية بشوت اضافي. رجع لي الموظف العربي اللي أخذ الطلب مني، ومعه قهوتي اللي أضاف لها شوت اسبريسو بدون ما يستبدل القهوة اللي دخلها. يعني اللاتيه اللي فوق ما هو خالي من الطعم، واللي المفروض انه حار، صار بارد.
القهوة 0/20.
الحلى:
أولاً، منيو الحلى في اللاونج غريب. ما أخذ في الاعتبار طريقة المدخنين في تناول الحلى مع السيجار. يعني مثلاً، المنيو كله مهلبية.. أم علي.. وأشياء زي كذا. هذي كيف تقدر تاكلها وانت تدخن سيجار؟! لكن ما راح أنقص شي من التقييم لهذا السبب، لأن الاختيارات هذي خاضعة للحريات والأذواق الشخصية.
طلبت أقل الأشياء ضرراً وأقربها لأن تكون مقبولة لمصاحبة التدخين: (أسياخ من الفواكه الاستوائية المغمسة بالشوكولا اللذيذة) أو شي مقارب من هذا السخف في الوصف.
وصل الطلب اللي جلست أتلهى فيه إلى أن يحلون لي اشكالية القهوة. نبدأ من أسوأ الأمور، الفاكهة دافية. الفاكهة اللي المفروض تكون باردة، مقدمينها دافية. وبعدين دافية من أحد جهات الصحن دون سواها. الظاهر إنهم تاركين الصحن بجنب مصدر حرارة إلى أن اكتملت القهوة وبعدين جابوها.
الشي الثاني، صوص الشوكولا اللي المفروض إنه تشوكليت مذوب.. أو شكل من أشكال الفوندو. الصوص عبارة عن صوص هيرشي اللي تشتريه من السوبرماركت.
الحلى 2/20.. لأن فيه سيخ من الفواكه ما كان دافي ولله الحمد وكان فيه لمسة برودة.
الاختصاص:
لما نتكلم عن التخصص في مراجعات اللاونجات، نتطرق لنقطتين هل المكان مخصص لتدخين السيجار فقط؟ وهي فيه خدمات تقدم بشكل حصري لمدخني السيجار والا لا؟
الشي الوحيد المتخصص في السيجار (عدى الجلسات اللي أخذوا فيها درجة كاملة) هي طفاية السيجار. في ما عدى عن ذلك:
وانا جالس أصور الطلب دخلوا بنتين أعمارهم لا يمكن تتجاوز الـ 14 أو 15. جلسوا في الطاولة اللي قدامي وكل واحدة منهم ولعت سيجارتها.. قعدوا ياخذون سيلفيات بالسيجارة، ولما خلصوا رموها في الطفاية وطلعوا. جاء زائر بعدهم دخن سيجارته وانتظر موظف يجي ياخذ طلبه بس لما شاف ما أحد راح يجيه طلع.
الباب المطل على الجلسات الخارجية كانوا يتركون يبقى مفتوح كل ما جوا الموظفين ياخذون شي من الكاونتر. في الجلسات الخارجية مسموح بتدخين الشيشة والسجائر العادية، لكن ما هو مسموح بتدخين السيجار. وكانت ريحة الشيشة تدخل على مكان التدخين اللي كنت فيه بسبب الباب.
في الاختصاص ياخذون 2/20 عشان عيون الطفاية.
التقييم النهائي (24/100):
اذا انك مقرر انك تزور اللاونج هذا في يوم من الأيام، أنا أقول استهد بالله، وصل لك ركعتين، وتعوذ من ابليس. لو تاخذ لك خيمة صغيرة من الرماية بـ 190 ريال وتسكر على روحك قدام البحر وتدخن داخلها أبرك وأرحم.
أنا لما رجعوا لي القهوة بالشكل اللي رجعوه فيها اخترت اني اطلع وأكمل سيجاري في الممشى المقابل للفندق وصولاً للمواقف. كانت تجربة سيئة الله لا يعيدها.
Comentários