كمدخنين سيجار، عندنا طرق كثيرة لقياس معدلات الرطوبة داخل الهيوميدور، سواء كانت هيقرومتر عادي، إلكتروني، أو حتى ذكي. لكن إلى 2019 وقت ما صدر الهيوميدمتر من سيجار ميديكس، ما كان عندنا طريقة فعلية لقياس الرطوبة داخل السيجار. كانت المسألة كلها تعتمد على احساسك، أو قدرتك على الصبر على السيجار الجديد اللي تشتريه ووضعه لفترات طويلة في الهيوميدور الخاص فيك قبل تدخينه. مع الثورة الكبيرة في شراء السيجار أونلاين، صار الإحتياج لوجود هذي الأداة أكبر من أي وقت مضى.
لكن قبل لا نتكلم عن استعمالات الجهاز، نحتاج نشرح الفكرة من وراه، وطريقة عمله بشكل سريع.
لما نجي نقيس الرطوبة، عندنا طريقتين: الطريقة الأولى هي قياس الرطوبة الحقيقية، وهذي تقاس عن طريق أخذ كيلوجرام من الهواء (بما فيها الماء المتبخر فيه) وقياس عدد الجرامات من الماء فيه ويطلع رقم يدل على الرطوبة الحقيقية. الطريقة هذي صعبة جداً على المستخدم العادي مثلي ومثلك.
الطريقة الثانية هي الرطوبة النسبية، وهذي هي اللي نستعملها كلما تكلمنا عن رطوبة السيجار. مثلاً، لما تشتري عبوة بوفيدا، راح تحصل ان الرقم الموجود عليها متبوع بـ rH.. وهذي اختصار لـ relative humidity (الرطوبة النسبية). طريقة قياسها يكون عن طريق قياس النسبة بين كمية الرطوبة الموجودة فعلياً في الهواء المحيط بالجهاز مقارنةً بكمية الرطوبة اللي يستطيع الهواء تحملها عند درجة الحرارة الحالية. لهذا السبب تلقى الرطوبة الحقيقية تقاس بأرقام، والرطوبة النسبية تقاس بنسبة مئوية.
فلما تلقى الهيقرومتر في الهيوميدور عندك يعطي قراءة 65rH معناته ان بخار الماء الموجود في الهيوميدور يشكل نسبة 65% من الرطوبة اللي يقدر الهواء داخل الهيوميدور على استيعابها، ما هو معناته ان 65% من الهواء مكون من بخار الماء.
طيب.. كل هذا جميل جداً، لكن كيف تقدر تقيس الرطوبة داخل السيجار اذا كانت كل أدوات القياس تعتمد على تشبع الهواء ببخار الماء؟!
هنا يجي دور جهاز مثل الهيوميدمتر من سيجار ميديكس.
الجهاز مكون من وحدة معالجة، شاشة، وعامودين معدنيين بأطراف مدببة. لما تشغل الجهاز، وتدخل العاموديم في الفوت (مكان ما تولع السيجار)، أول شي راح يسويه هو إنه يحسب نسبة المياه في المادة الصلبة المحيطة فيه. السيجار المحفوظ في درجة رطوبة وحرارة مثاليين راح يعطي نتيجة تتراوح بين 12% - 15% من الماء في محتوياته. الجهاز وقتها بعملية تحويل بسيطة يعطيك درجة الرطوبة الافتراضية للبيئة اللي كان فيها مخزن فيها السيجار على جردة الحرارة المثالية للتخزين. يعني لما يقيس الجهاز درجة رطوبة 15% راح يفترض انك مخزنه في درجة حرارة طبيعية ويحولها لـ 70rH. وهذا هو الرقم اللي تشوفه على الشاشة.
على الرغم من ان الجهاز مثالي جداً لكل مقتني للسيجار، وخاصة اللي يطلب اونلاين بكثرة مثلنا، إلا إن طريقة القياس هذي تبين لنا عدد من جوانب القصور فيه:
طريقة تصميم العامودين في الجهاز تعني انك محدود في نوعية السيجار اللي تقدر تقيس رطوبته. لو عندك سيجار رينقه صغير، أو سيجار بيرفيكتو (مدبب الطرف في النهاية)، أو سيجار الفوت فيه مسكر، ما راح تقدر تقيس درجة الرطوبة فيه. (الفوت المسكر تقدر تثقبه بسهولة لكن لأنه مسكر القراءة فيه ما راح تكون دقيقة).
نظراً لأن السيجار يفترض درجة حرارة معينة، هذا الشي يؤدي لقرارءات خاطئة لما تقيس رطوبة السيجار بعد تعرضه لحرارة مفاجئة. مثلاً وجوده في السيارة وانت رايح للاونج وقت الظهر. لو تقيسه لما توصل راح تلقى الرطوبة في الثمانينات على ارفغم من ان رطوبة السيجار كانت 69 قبل لا تطلع من البيت.
لكن على الرغم من هذي العيوب، أحس إن وجود مثل هذي الأداة، وبالأخص إن سعرها في متناول أغلب مدخني السيجار، يبقى الهيدرومتر من سيجار ميديكس أفضل طريقة حتى تريح بالك قبل لا تدخن سيجارك.
Comments