Cigar 101: Plume vs Mold

شفت مجموعة نقاشات تحت بوست نزله الأخ العزيز cigar_aj@ والآخر عند المتميز دوماً komar_aldalwi@ بخصوص صور سيجار نزلوه وعليه نقط بيضاء. لما سألوا بعض المتابعين "هل هذا عفن؟" كانت الإجابة: "لا، هذي أملاح تظهر مع ظروف التخزين اذا كانت صحيحة 100%". لما شفت التضارب في الآراء، قلت أحاول أقدم رأيي الشخصي في المسألة.

قبل كل شي نحتاج نفهم التعريف الدارج للـ Plume، أو ما يترجم للعربية تحت مصطلح "أملاح":

الـ Plume يُعرّف على إنه كريستالات بيضاء صغيرة تتشكل على رابر (الغلاف الخارجي) للسيجار. الآراء حول تشكله متضاربة، بحيث فيه مصنّعين سيجار يقولون إنه سكّريات تظهر على السطح (رأي ريك رودريقز الماستر بليندر في CAO)، وفيه من يقول إنها أملاح تظهر بشكل طبيعي من عملية التخزين، ومنها تجي تسميتنا العربية له. أما الرأي السائد إنها زيوت فقدت رطوبتها وطلعت على سطح الرابر. في الأخير الكل متفق إن شكلها عبارة عن بودرة كريستالية بيضاء تكون على سطح السيجار.

السائد إنها تختلف عن العفن في شيئين:

1. لونها: الـ Plume متفق على إن لونه أبيض، مقارنة بالعفن اللي يكون لونه إما مائل للأخضر، أو مائل للأزرق.

2. مكانها: الـ Plume ما يكون إلا على الرابر.. بينما العفن ممكن يكون على الرابر، أو يكون واضح ومبين على الفوت (مكان ما تولع السيجار) أو إذا انك قصيت السيجار راح تلقاه في الحشوة.

هذي المعلومات السائدة والمتداولة في أوساط السيجار وحتى في مجلات السيجار العالمية مثل سيجار أفيشيونادو وغيرها. لكن هل هي صحيحة؟ في رأيي الشخصي اللي ما ألزم فيه أحد: لا..

فيه دراسة سووها في أستراليا، وراح أنقلها هنا بتصرف، بحيث طلبوا من المشاركين ارسال سيجار عليه أملاح، وراح يدخلونها مختبر اسمه "مختبرات استراليا بايوتيك" على حسابهم الخاص، ولو اتضح إن اللي عليها ما هو عفن، راح يعطون المشارك 350 دولار هدية. عشرات مدخنين السيجار شاركوا في هذي الدراسة، وكلهم أرسلوا أفضل ما عندهم من السيجارات اللي تراكمت عليها "الأملاح". لما وصل السيجار لـ Friends of Habanos، ودوها للمختبر وحللوها، وأثبتوا بالدليل القاطع إنه كل البودرة البيضاء اللي تغطي السيجار عبارة عن أحد سلالات الفطريات.. نزلت ستوري في الانستجرام محتوية على صور السيجار اللي خضع للتجارب المذكورة مع استفتاء عن هل هي عفن والا أملاح، وراح نتطرق لها كل صورة على حدة هنا:

• أولا، فطر الـ Aspergillus:

فصيلة من الفطريات هذي اسمها Aspergillus، والنوع هذا من الفطريات ينتشر بالعادة على الأسطح المحتوية على نسبة عالية من السكريات أو النشويات، مثل الخبز والبطاطس. موجودة على رابر الهويو ابيكيور ايسبيسيال مع صورة مقربة للفطريات:

وهنا نفس الفيصلة موجودة على رابر البور لاراناقا مع صورة مقربة لذات الفطريات جاية من شخص ثاني غير الشخص اللي أرسل السيجار الأول:

• ثانياً، فطر الـ Penicillium ascomycetous:

هذا النوع من الفطريات من أكثر أنواع الفطريات انتشاراً وأهمها بالنسبة لنا كبشر، ما هو من ناحية استهلاكه طبعاً، لكن من ناحية دخولة في تصنيع البنسيلين (مذكورة في الإسم)، ودخوله في تصنيع بعض أنواع الأجبان، وأحد الأمثلة عليه هو الموجود على رابر البوليفار:

• ثالثاً، فطر الـ Candida Parapsilosis:

الفطر هذا أقرب ما يكون لعائلة الخميرة اللي تنحط في الخبز. هذا أكثر فطر ممكن يتواجد على بشرة يد الإنسان، لذلك انتقاله للسيجار جداً سهل وسريع.. مثال عليه اللي على رابر الـ RyJ:

• رابعاً، فطر الـ Wallemia sebi:

الفطر هذا يتكاثر على الأسطح المالحة جداً أو السكرية جدأ، ويتواجد بكثرة في الهواء المحصور داخل البيوت. يتميز عن بقية أنواع الفطر المذكورة بعدم احتياجه لتشبع الأسطح بالمياه وممكن ينمو على أسطح شبه جافة. مثاله الموجود على رابر الإتش أبمان:

• ختاماً:

نحتاج نفهم ليش تطلع الفطريات اللي لونها أبيض بالذات في ظروف التخزين "الجيدة".. العفن الأخضر والأزرق ما يبدأون بالظهور على السيجار إلا إذا كانت درجة الرطوبة عندك تتجاوز الـ 80 بشكل متكرر. لكن العفن الأبيض يبدأ في الظهور في منطقة الرطوبة المحصورة ما بين 75 و 80. الشي هذا ممكن إنه يحصل حتى وانت حاط بوفيدا في الهيوميدور تحت ظروف معينة. في حال تذبذب الحرارة وارتفاعها بشكل كبير، البوفيدا يطلق جزء من الرطوبة المحبوسة داخله أكبر من الرقم اللي المفروض انه يقنن الرطوبة فيه. يعني، لو الهيوميدور حقك توصل فيه درجات الحرارة لمنتصف الثلاثينات، راح تلقى ان البوفيدا ما هو قادر يلحق حتى ينزل الرطوبة لـ 69.. وممكن ترتفع الرطوبة في بيئة الهيوميدور لحظياً لفوق 75.

أبواغ الفطريات موجودة حولنا وحوالينا بشكل مستمر.. حتى في أكثر البيوت نظافةً. مثل ما ذكرنا، تتواجد في أجواء البيت وعلى بشرة اليد. لما تفتح الهيوميدور بعضها راح يدخل لا محالة. لما تلمس سيجارك بعضها راح ينتقل لا محالة. لما تتذبذب درجات الحرارة وترتفع الرطوبة نسبياً تنتج عندك بيئة قابلة لهذا النوع من الفطريات إنه ينمو.

في قناعتي الشخصية، فكرة الأملاح وتواجدها على سطح السيجار خرافة. بدليل إنه من تاريخ اطلاق دراسة FoH في 2017 وحتى اليوم ما أحد قدر إنه يقدم سيجار واحد يكسب من خلاله جائزة الـ 350 دولار المعروضة. لكن السؤال اللي يطرح نفسه، وش تسوي بالسيجار اذا صارت عليه الطبقة هذي؟

الكلمة الأولى و الأخيرة لك، عزيزي القارئ. فيه من يقول امسح السيجار ودخنه. وهذا شي أقدر أتفهمه حتى لو ما قدرت أتفق معه.. بعد كل شي، انت قاعد تتعرض للفطريات هذي بكميات صغيرة طوال اليوم. عن نفسي بمجرد ما أشوف السيجار تغير شكله عن اليوم اللي طلع فيه من المصنع، أحاول أبعد عنه قدر المستطاع.

في الأخير مثل ما قلت، الأمر راجع لك ولقناعتك الشخصية.