من جماليات فندق الوالدورف آستوريا في منطقة دبي المالية احتوائه على خيارات متعددة للطعام مهما كانت الوجبة اللي تقصدها سواء كانت فطور، غداء، عشاء، أو حتى برنش.
أحد أجمل هذي الخيارات مطعم حاز على عدد خيالي من الجوائز على مر السنين، لدرجة احتياجهم لتخصيص أرفف كاملة في اللوبي حتى يستعرضونها.
ثيم المكان مستوحى من وال ستريت في الثمانينات، وحتى يصفون أطباقهم بأنها تحاكي مرتفعات ومنخفضات سوق الأسهم اللي تخليك دائماً في حالة تحفز وترقب لما هو قادم. طبعاً الاسم لوحده دليل كافي على هذا الارتباط: الثور يرمز لارتفاع السوق والدب يرمز لانخفاض.
في التدوينة تحت بنأخذ نظرة سريعة على طلب لشخصين.
للمقبلات أخذنا سلطة الوالدورف وهي عبارة عن سلطة تحضر على الطاولة ومكونة من دجاج مدخن على سرير من الكايل المخلل ومطعّمة بالتفاح المشوي وعليها دريسنق خردل وجوز. السلطة فيها تمازج ما بين تدخين الدجاج وطعم شواء التفاح، وحلاوة التفاح تكسر كثير من حمضية الدريسنق. السلطة متوازنة بشكل ملفت للانتباه.
طبق المقبلات الثاني عبارة عن وصلات من السالمون النيء منقوعة في دريسنق حامض مكون من الباشن فروت والكلامنسي.الأحماض الموجودة في الدريسنق تتفاعل مع سطح السالمون بحيث تحس كأنه مطبوخ، على الرغم من إنه نيء. وهذي فكرة مقاربة جداً للسيڤيتشي. والنقط الخضراء اللي عليه هي مكونة من ماتشا وكاڤيار. كنت اتمنى لو ان شرايح السالمون كانت أنحف شوي او حتى لو كانت أنحف كثير وسووها كارباتشيو، لكن بشكل عام حموضة الدريسنق تنسيك أي شكوى وما يبقى في ذهنك إلا هذاك الألم اللذيذ في أطراف اللسان من حموضته الواضحة.
الطبق الرئيسي كان تحفة فنّية مكونة من التالي:
ستيك واقيو ستريبلوين استرالي بدرجة ترخيم مذهلة (+9) مطبوخ ميديوم رير.
بطاطس مطهية على البخار وتقدم مع ساور كريم وبيف بايكن.
مشروم سوتيه مطعّم بالزبدة بشكل ينافس ترخيم الستيك.
طبعاً التجربة هذي مهم ذكرها حتى لما اتكلم عن السيجار لاونج في الفندق، بنحتاج نرجع لها لما يجي طاري الطعام المقدم هناك.
Comments