سيجار اليوم ابتدت قصته قبل شهرين، من تغريدة للرجل اللي كل يوم نتعلم منه شي جديد: @SaCigar.
من وقتها وسيجار Don Carlos Eye of the Shark من Arturo Fuente في الهيوميدور وجالس ينتظر. ولأن هالأسبوع تكللت فيه إنجازات تتعلق باستديو التطوير حقنا، جاء دوره.
السيجار يتربع على عرش قائمة أفضل سيجار لعام 2017، وعن استحقاق. نبتدي من منظره الخارجي اللي خالف توقعاتي. الغلاف الخارجي للسيجار من الكاميرون. وتجربتي مع الكاميرون بَنَت داخلي سلسلة من التوقعات أولها الملمس الخشن اللي يشبه ورق الصنفرة. والنكهة الأحادية (مكسرات). كنت جداً غلطان!
السيجار حجمه (552) ولونه وملمسه الخارجي كأنه ملفوف بـ جلد طبيعي من نعومته والزيوت العطرية اللي فيه. وجوده في الهيومودور اللي مخصصه للسيجار الكوبي على درجة رطوبة 65Rh أعطت دخانه كثافة ملحوظة مقارنة باللي كان في 69Rh.
الحين نجي للطعم.. في البداية حسيت إني غلطت باستعمال درجة رطوبة أقل لأن التوليعة وأول سحبتين كان حارة بشكل ملحوظ. كانت النكهة حلوة بس الحرارة خلتني أقلق. لكن بمجرد ما وصلت للسحبة الثالثة اختفت الحرارة بشكل كلي وكل اللي تبقى طعم يمنح حقوق المواطَنة بالكامل للإبتسامة على وجهك.
النصف الأول من السيجار أخذني لديسمبر من السنوات اللي كنت أشرفت فيها على موسم القمح في مزرعتنا. ريحة أرض حايل المشبعة بخام الحديد وهي توها مسقيّة ومحروثة. ريحة حطب السمر. ونكهة التبغ المعتق 10 سنوات تطغى على الثنتين. بالعادة أسمع كتابي وأنا أدخن، لكن اليوم كنت أنا والسيجار لوحدنا
بعدين يجي النص الثاني حامل معه الكثير من النصف الأول ولكن مخبي معه مفاجأة صغيرة. نكهة حمضية لذيذة ذكرتني ببداية أيام الحجر ومنهج كيكة الليمون اللي مشى عليه الشعب بالكامل. قشر الليمون وقشر البرتقال كان حضوره جميل ويكون أقوى بين السحبات، ما هو خلالها.
كنت أواجه صعوبة في إني أوقف. السيجار كان لذيذ جداً حتى آخر سحبة منه. سيجار فوق التقييم. عيبه الوحيد هو إنه لما تبدأ تدخنه راح يجي وقت ويخلص.
Comments