سيجار اليوم حائز على جائزة أفضل سيجار لعام ٢٠١٩ من سيجار أفيشيونادو: Aging Room Quattro Nicaragua، وراح أدخن حجم espressivo (٥٥٠) منه.
السيجار عبارة عن تعاون بين أهم اسمين في عالم صناعة السيجار حالياً (خاصة البوتيك سيجار)، وهم رافاييل نودال و أي جي فيرنانديز. وتم تشكيل السيجار من خلطة نيكاراجوية كاملة (Nicaragua puro).. يعني الحشوة، والرباط الخارجي، والقشرة الخارجية للسيجار كلها من محاصيل نيكاراجوا.
أحتاج أتكلم شوي عن شكل السيجار الخارجي. أولاً، السيجار box pressed، يعني شبه مربع. وملمسه كأنه مخملي من جودة الـ wrapper ومن زيوت التبغ اللي على القشرة الخارجية. حتى لما دققت قدرت اشوف النفط البنية اللي هي عبارة عن فقاعات صغيرة مليانة زيوت عطرية.
سحبة السيجار ممتازة جداً. خفيفة، بس فيها مقاومة بسيطة تخلي التدخين ممتع. بس كل هذا ما هو مهم قدام التجربة اللي يعطيها هذا السيجار. الطعم لحاله حكاية. فيه نوتة قهوة دارك روست ومعها دارك تشوكليت وشي يشبه دبس محروق، تحديداً دبس التمر. وفوق هذا كله لذعة البهارات واضحة في الخلفية.
وفيه شي يميز السيجار غير الكوبي عن السيجار الكوبي واضح جداً هنا. فيه انتقال بالنكهات وقوة السيجار كل ما تعمقت فيه. السيجار الكوبي consistent. من أول السيجار لآخره نفس الطعم. هنا الحكاية تختلف، السيجار بمجرد ما بشوفك ارتحت وبديت تتعود يقوم يقلب الطاولة على راسك.
في النص الثاني الحلاوة اللي فيه اللي كنت اظنها دبس صارت اقرب للفاكهة المجففة، وطعم التبغ بدأ يصير اقوى وفيه نوتة حمضية بدت تطلع. ونقطة ثانية تحسب للسيجار هذا. الدخان اللي يطلع منه كثيف جداً... ما أقصد الكثرة، أقصد الكثافة. لدرجة أحس إنه ممكن الدخان ينعلك من كثافته.
سيجار ممتع من أوله لآخره. وعلى الرغم من صغر حجمه نسبياً (٥٥٠) إلا أنه قعد معي تقريباً ساعة وربع. بس هل يستاهل إنه يكون سيجار العام بلا منازع؟ ما اعتقد. من الظلم إنه يكون هو الأول والـ Padrón Serie 1926 بالمركز الثاني، بدون لا نتكلم عن بقية اللستة. تقييمي له A.
Comments